پنجاب کے وزیر صنعت و زراعت ایس ایم تنویر نے کہا کہ ہم نے گذشتہ چند ماہ میں پاکستان کی ڈوبتی معیشت کو سنبھالا دیا ہے اور ہم انشاء اللہ آئندہ چند ماہ میں صوبے میں ترقی وخوشحالی کے ایک نئے سفر کا آغاز کریں گے۔ انہوں نے کہا کہ چکوال، راولپنڈی اور اسلام آباد چیمبرز آف کامرس کے زیر اہتمام ضلع چکوال میں نیلہ دولہ انٹرچینج کے مقام پر ایک نئی انڈسٹریل اسٹٹ کا قیام عمل میں لایا جائے گا جس سے علاقے میں ترقی و خوشحالی کے ایک نئے دور کا آغاز ہو گا۔ان خیالات کااظہار انہوں نے چکوال چیمبر آف کامرس اینڈ انڈسٹری کے سالانہ عشائیہ سے خطاب کرتے ہوئے کیا۔
پنجاب کے وزیر صحت ڈاکٹر جمال ناصر نے کہا کہ پنجاب کے عوام کے لئے علاج ومعالجے اور صحت کی سہولیات کو بہتر بنانے کیلئے میں دن رات مصروف ہوں۔ انہوں نے کہا کہ وزیراعلیٰ پنجاب کی قیادت میں ہم صوبے میں ترقی کے ایک نئے باب کا اضافہ کر رہے ہیں۔
چکوال چیمبر آف کامرس کے صدر وقار بختاوری نے نیلہ دولہ انٹرچینج کے مقام پر ایک نئی انڈسٹریل اسٹیٹ کے قیام کا مطالبہ کیا۔ انہوں نے کہا کہ سیاحت کے فروغ کیلئے بھی چکوال سمیت پنجاب کے دیگر علاقوں میں سیاحت کا انفراسٹریچکر بہتر کیا جائے جس سے معیشت کیلئے فائدہ مند نتائج برآمد ہوں گے۔ انہوں نے مزید مطالبہ کیا کہ خطہ پوٹھوہار میں غیر فعال ڈیمز کو جلد فعال بنانے کیلئے اقدامات کئے جائیں۔
اسلام آباد چیمبر آف کامرس کے صدر احسن بختاوری نے کہا کہ خطے میں روزگار کے نئے مواقع پیدا کرنے اور سرمایہ کاری کو فروغ دینے کیلئے ایک نئی انڈسٹریل اسٹیٹ وقت کی اشد ضرورت ہے اور اس امید کا اظہار کیا کہ پنجاب کے وزیرصنعت و زراعت ایس ایم تنویر کی قیادت میں یہ منصوبہ جلد پایہ تکمیل کو پہنچے گا۔
فیڈریشن آف پاکستان چیمبرز آف کامرس کے نائب صدر قاضی اکبر نے کہا کہ چکوال کے چھپڑ بازار میں میونسپل کمیٹی کے تحت سرکاری کرایہ دار دکانداروں کو مالکانہ حقوق دیئے جائیں۔
چکوال چیمبر آف کامرس کے کوآرڈینٹر خواجہ عارف نے چکوال کے ہسپتال میں طبی سہولیات کو مزید بہتر بنانے کا مطالبہ کیا تا کہ عوام کو علاج معالجے میں معیاری سہولت میسر ہو۔
0 کمنٹس:
Post a Comment